S’atividade, finantziada cun su dinari de sa Lege 482/1999 (annualidade 2012) e contivigiada dae sa Sotziedade Cooperativa “L’Altra Cultura”, at dadu a sos mastros, sos ludotecàrios e a chie totu traballat cun pitzinnos minores trastos de traballu pro fàghere animatzione in limba sarda.
Dotzente de su cursu, chi s’est fatu su 13 de nadale de su 2015, est istadu Antoni Dettori, espertu de animatzione teatrale e de arteterapia.
Su 4 e su 5 de cabudanni 2013 sos Comunes de Bosa e de Iscanu ant ospitadu una de sas espertas prus mannas in contu de bilinguismu infantile: sa dut.ssa Antonella Sorace, ordinària de Linguìstica Acuisitzionale in s’Universidade de Edimburgo.
Sa professoressa Sorace, connota in totu su mundu ca at fundadu su servìtziu de informatzione “Bilingualism Matters”, at faeddadu de bilinguismu finas in sa trasmissione televisiva “Superquark”, ispieghende su profetu linguìsticu e cognitivu chi tenent sos pitzinnos pesados in duas limbas.
Su progetu “Bilinguismu Creschet”, finantziadu dae sa Regione Sardigna, est istadu coordinadu dae s’assòtziu “Sa Bèrtula Antiga” e dae sa Sotziedade Cooperativa “L’Altra Cultura”.
Sa Sotziedade “L’Altra Cultura” at agiuadu su Comune de Iscanu a aprontare sa segunda e sa de tres annualidades de su cursu “Didatichende” dedicadu a sos mastros e a sos professores interessados a si “fraigare a sa sola” su materiale didàticu in sardu.
Sos cursos si sunt fatos in Iscanu su 30 de martzu 2014 e su 14 de nadale 2014 e, cun s’agiudu de sos dotzentes Manuela Mereu e Antoni Nàtziu Garau, ant afrontadu sos temas de didàtica aunende una parte teòrica a una parte pràtica de cunfrontu e de isperimentatzione.
Pro afortigare sas cumpetèntzias de sos operadores de sos ufìtzios linguìsticos sa Sotziedade Cooperativa “L’Altra Cultura”, incarrigada dae sa Regione Sardigna, at aprontadu 6 dies de istùdiu chi si sunt fatas in Santa Cristina de Paulle dae su 21 de ghennàrgiu a su 4 de martzu de su 2013. Ant fatu de dotzentes espertos de livellu internatzionale e, a cursu finidu, chie at partetzipadu at retzidu una tzertificatzione.
Unu cursu aprontadu dae sa Asl paris cun sa Sotziedade Cooperativa L’Altra Cultura pro imparare a sos dischentes a contare mègius sa maladia issoro. Su cursu, fatu in su 2014 in sa sala de sas cunferèntzias de s’ispidale San Martino, at afrontadu temas comente s’impreu de sa limba sarda in àmbitu mèdicu, cun reladores espertos de linguìstica (Antoni Nàtziu Garau, Diegu Corràine, Salvatore Cubeddu ) e dutores (su diabetòlogu aristanesu Gianfranco Madau, su radiòlogu tataresu Pitzente Migaleddu).
Sa Sotziedade Cooperativa L’Altra Cultura est ativa finas in sa sensibilizatzione pro s’impreu de sa limba sarda in sas impresas. In su 2014 at ativadu unu cursu de formatzione pro impresas de su cumpartu turìsticu e cummertziale, profundende sos argumentos relativos a su marketing, a s’etichetadura de sos produtos e a sas normas pro impreare sas limbas minoritàrias in àmbitu cummertziale.
Copyrights © 2025 L'altra Cultura - Non si podet impreare sena autorizatzione.
Progetadu e fraigadu dae Rosso Digitale